İyunun 2-də Azərbaycan Dövlət Pedaqoji Universitetinin (ADPU) Şəki filialında təntənəli “Məzun günü” tədbiri keçirilib. Karyera Mərkəzinin müdiri Xuraman Həmidova və Tələbə Həmkarlar İttifaqının sədri, Təbiət fənləri və onların tədrisi texnologiyası kafedrasının baş müəllimi Günel Əliyevanın təşkilatçılığı ilə baş tutan tədbirdə filial rəhbərliyi, professor-müəllim heyəti, 2024-2025-ci tədris ilinin məzunları, onların valideynləri və digər tələbələr iştirak ediblər.
Tədbir Azərbaycanın Dövlət Himninin səsləndirilməsi ilə başlayıb. Ardınca ölkəmizin suverenliyi və ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.
Filialın direktoru tarix üzrə fəlsəfə doktoru dosent Vurğun Məmmədov açılış nitqi ilə çıxış edərək iştirakçıları salamlayıb, məzunları təbrik edib və onlara gələcək fəaliyyətlərində uğurlar arzulayıb.
Tədbirdə direktorun müşaviri dosent Rafiq Rəsulov, tədris işləri üzrə direktor müavini dosent Gülarə Abdullayeva, Təbiət fənləri və onların tədrisi texnologiyası kafedrasının müdiri professor Firədun İbrahimov, elmi işlər üzrə direktor müavini dosent Nuralı Çələbiyev, Karyera Mərkəzinin müdiri Xuraman Həmidova və valideyn Ülviyyə İslamova çıxış edərək məzunlara təbriklərini çatdırıblar.
Tədbir çərçivəsində təhsilini “əla” qiymətlərlə başa vuran və ictimai fəaliyyətlərdə fərqlənən məzunlara fəxri fərmanlar və təşəkkürnamələr təqdim olunub.
Sonda tədbir musiqili proqramla davam etdirilib və iştirakçılar üçün yaddaqalan anlar yaşanıb.

• < Əvvəlki
• Növbəti >